Шерзод Нажмидинов қызмет жолы туралы: Кез келген тәжірибе – «үлкен мектеп»

Әлемде түрлі қызықты мамандық бар. Сондай мамандықтардың бірі – кондиционер қондырушы. Қай мамандық болса да, өз ісінің шеберін көргенде жаның сүйсінеді. Біз үйге кондиционер қойдырып жүргендерді көріп жүрміз. Ал үлкен зауыт-цехтарға орнататын мамандарды және олардың жұмыс жүйесін меңгеретіндер туралы көп біле бермейміз. Бүгін сондай маман – ірі ғимараттарға, өндіріс орындарына кондиционер жүйесін орнатушы Шерзод Нажмидиновпен сұхбаттастық.

Шерзод мырза, қай өңірдің тумасысыз, өзіңіз жайлы айтып берсеңіз.

Бүгінде үш қыз өсіріп отырған әкемін. Жолдасым екеуміз қарапайым отбасыдан шыққан жандармыз. Жеке басыма келетін болсам, Жамбыл облысының Тараз қаласында туып-өстім. 1986 жылы М. Горький атындағы №13 мектепке алғашқы сыныпқа бардым. 1997-2001 жылдар аралығында М. Дулати атындағы Тараз мемлекеттік университетінде экономист мамандығын оқыдым. Кейін жұмыс барысында заңгердің білімі қажет болып, оны да оқыдым. Яғни, заң бакалавры да болдым. 

Бірақ еңбек жолыңызды жастардың арман қаласы – Алматыдан бастапсыз, қалай болды?

Иә, еңбек жолымды университеттен кейін Алматыда климаттық жүйеге қатысты компанияда инженер болып бастадым. Қарапайым менеджерден бастап, ұйымдар мен компанияларға кондиционер қондыруды меңгердім. Егер дәлірек айтсам, бұл біз үйде көріп жүрген қарапайым кондиционер емес, үлкен ғимараттардағы, цехтардағы вентиляциялық жүйені реттейтін ауқымды кондиционерлер. 2002-2006 жылдар аралығында осы компанияда еңбек етіп, жақсы тәжірибе жинадым. 

Кейін 2007-2022 жылдары басқа компанияға ауысып, бас менеджерден бастап, коммерциялық директор лауазымына дейін көтерілдім. Жұмыстағы толық жүйеге – менеджмент, құжат айналымы, тіркеу, жалпы бақылау менің міндетіме кірді. Одан бөлек компания жұмысын жақсарту үшін жаңа тәжірибе енгізу, корпоративтік ұйымшылдықты арттыру да жолға қойдым. Яғни, менеджмент және басқару жүйесіндегі ілгерілеуге жауапты болдым.

Ерекше салада еңбек етіп келесіз. Біз көп кездестіре бермейміз немесе оқулықтарда көп айтыла бермейтін мамандық. Толығырақ айтып берсеңіз.

Біздікі үйдегі қарапайым кондиционерлерден бөлек болғандықтан, бұл кондиционерлердің жұмысы көп нәрсенің сапалы қызметіне ықпал етеді. Мысалы, үлкен цехқа орнатсақ, онда сол цехтағы өнімді сақтау, температурасын реттеу, ол жердегі адамдардың жұмыс істеуіне қолайлы жағдай жасау – бәрін жүйеге қою керек. Оңай шаруа емес. Бірақ сенің жұмысың басқалардың еңбек етіп, қызметіне оң әсер еткенін көргенде бір марқайып қаласың. Мұны жасырмаймын.

Бастысы өзіңізге ұнайды ғой?

Әрине, жұмысым ұнайды. Жақсы көріп, қызығып еңбектенемін. Сондықтан да қызмет жолымда жақсы дәрежеге дейін көтерілдім деп ойлаймын. Кез келген тәжірибе – үлкен мектеп. Шарт жасасу, халықаралық компаниялармен серіктестік құру, компаниядағы инфрақұрылымды жолға қою теңдессіз тәжірибе болды. Техниканы қондырудан бастап, әрі қарай сапалы қызмет етуінде бақыладық. Яғни, қарапайым тілмен айтқанда, қандай кондиционер керек және ол қалай сапалы қызмет көрсетеді, ұзақ қызмет етуінің тиімді жолдары қандай – осылардың бәрін білу және меңгеру, жолға қою оңай жұмыс емес. Бұл еңбегімді компания басшылығы жоғары бағалап, түрлі мақтау қағазы мен марапаттар табыстады.

Алдағы жоспарыңыз қандай?

Шынымды айтсам, жоспарым, арманым көп. Алматы сияқты ірі қалада еңбек еткен соң, жақсы меңгерген соң, әрі қарай ірі масштабқа ұмтылғым келеді. Мақсатым – халықаралық деңгейдегі шебер болу. Бірнеше елдің мамандарымен келісімшарт жасап, келіссөз жүргізіп үйрендім. Осы бағытты әрі қарай шыңдағым келеді. Себебі мамандығым – мақтанышым. Адамдардың климаттық атмосферасын жақсартуға көмектесемін. Бұдан артық бақыт бар ма?!

Сұхбатыңызға рақмет!