Мемлекеттік тілге құрмет көрсету – әрбір азаматтың азаматтық борышы

Тіл – ұлттың рухани негізі, халықтың тарихы мен мәдениетін, салт-дәстүрі мен дүниетанымын ұрпақтан ұрпаққа жеткізетін баға жетпес құндылық. Ана тіліне деген құрмет – елге, жерге, Отанға деген құрметтің ажырамас бөлігі. Сондықтан мемлекеттік тілге құрмет көрсету – барша азаматқа ортақ міндет әрі азаматтық борыш.

Қазақстан Республикасының мемлекеттік тілі – қазақ тілі. Қазақ тілінің мемлекеттік тіл мәртебесі еліміздің Конституциясында бекітілген. Мемлекеттік тілдің қолданыс аясын кеңейту – тек мемлекеттік органдардың немесе белгілі бір саланың ғана міндеті емес, бүкіл қоғамның ортақ ісі.

Қазіргі таңда қазақ тілінің қоғамдық өмірдің барлық саласында қолданылуына ерекше мән берілуде. Мемлекеттік мекемелерде іс жүргізу, азаматтарға қызмет көрсету, ресми құжаттарды әзірлеу барысында қазақ тілінің қолданылу деңгейін арттыру бағытында жүйелі жұмыстар жүргізілуде. Бұл ретте әрбір мемлекеттік қызметші мемлекеттік тілде сауатты сөйлеп, ресми құжаттарды дұрыс рәсімдей білуі қажет.

Мемлекеттік тілге құрмет ең алдымен күнделікті қарым-қатынастан басталады. Қазақ тілін үйрену, оны дұрыс қолдану, тіл мәдениетін сақтау – әрбір азаматтың ел болашағына қосқан үлесі. Тілді білу тек міндет ретінде емес, ұлттық құндылыққа деген құрмет ретінде қабылдануы тиіс.

Әсіресе жас ұрпақтың мемлекеттік тілге деген қызығушылығын арттыру маңызды. Себебі тілдің болашағы – оны меңгерген, күнделікті өмірде еркін қолданатын ұрпақтың қолында. Отбасында, білім беру ұйымдарында, еңбек ұжымдарында қазақ тілінде сөйлесуге қолайлы орта қалыптастыру мемлекеттік тілдің мәртебесін одан әрі нығайта түседі.

Мемлекеттік тіл – қоғамды біріктіретін маңызды факторлардың бірі. Қазақ тілін білу азаматтардың бір-бірімен еркін қарым-қатынас жасауына, ұлттық мәдениет пен дәстүрді терең түсінуіне мүмкіндік береді. Сонымен қатар мемлекеттік тілді құрметтеу еліміздегі өзге этнос өкілдерінің мәдениеті мен тілдеріне деген құрметпен қатар жүреді.

Тіл мәселесінде нәтижеге жету үшін мәжбүрлеуден гөрі үлгі көрсету, түсіндіру және қолдау маңызды. Қазақ тілін үйренуге ниет білдірген азаматтарға жағдай жасау, тілдік ортаны қалыптастыру және оның күнделікті қолданысын арттыру – ортақ жауапкершілік.

Қорыта айтқанда, мемлекеттік тіл – тәуелсіз Қазақстанның басты рухани құндылықтарының бірі. Оны құрметтеу, дамыту және күнделікті өмірде қолдану – әрбір азаматтың ел алдындағы азаматтық борышы. Мемлекеттік тілге деген құрмет артқан сайын ұлттық бірегейлігіміз де нығая түседі.

Қазақ тілін құрметтеу – қазақ халқын ғана емес, Қазақстанды, оның тарихын, мәдениетін және болашағын құрметтеу. Сондықтан мемлекеттік тілдің мәртебесін көтеру – баршамызға ортақ міндет.

Жамбыл облысының қылмыстық

істер жөніндегі мамандырылған 
ауданаралық соты 

хатшысы Иблиева Н.Ә