Күнделікті мақсат қоямын – қаржыгер Әділет Байбековпен сұхбат

Бүгін біз Жамбыл облысының мақтанышы, туған өңірінің банк саласын дамытуға үлес қосып жүрген тағы бір тұлғамен танысамыз. Жаңатас қаласының тумасы, қаржы саласын мектеп күнінде таңдап, бүгінде үлкен жетістіктерге жеткен Әділет Байбековпен сұхбаттасамыз.  

Әділет Жаңатаста дүниеге келгенмен мектеп табалдырығын Таразда аттаған. Ыбырай Алтынсарин атындағы №49 мектептің түлегі. Үйленген және үш баланы тәрбиелеп отыр. 

Бала Әділет қандай оқушы болды?

Мектепте белсенді оқушылардың қатарында болдым. Қоғамдық шараларды ұйымдастырып, жүргізуші қызметін де атқардым. Бала күннен есеп-қисап, логикаға бейім болғандықтан, математика сүйікті пәндерімнің бірі болды десем болады. Сондай-ақ, әр баланың мектеп кезінде қатысатын үйірмесі бар ғой. Біздің кезімізде ондай үйірме, секциялар көп болған жоқ. Дегенмен таэквандоға қатыстым. 

Неге қаржы саласын таңдадыңыз?

Мен үшін мамандық таңдау қиын болмады. Неге екенін білмеймін 9-сыныпта банк қызметкері боламын деп шешім қабылдадым. Ол кезде банкінің не екенін, онда қалай қызмет ететінін де білмейтін едім. Дегенмен халыққа қызмет көрсететінін және математикаға жақын екенін түсінетінмін. Сол себепті тоғызыншы сыныпта банк ісіне баратынымды білдім. 

Мамандық пен жар таңдаудан қателеспеу керек дейді ғой. Мен екеуінен де қателеспедім. 2000 жылы Тараз мемлекеттік университетіне экономика мамандығына түстім. 2004-2006 жылдары магистратурада оқыдым, сөйтіп экономика магистрі атандым. Бірден жұмысқа кірдім. Әрине, өзім армандаған жұмысқа – банкке орналастым. Ол кезде «Темір банк» болатын. Сол жерден қызмет жолым басталды.

Әрі қарай қалай жалғасты?

Ең алдымен, несие менеджері болып жұмысқа тұрдым. Арасына жыл салып, позициям жоғарылады. Брокер сауда желі агенттігінде бөлім басшысы болып ауыстым. Әрі қарай басқа банкке де басшылық қызметке шақырды. Ұсыныс түскен соң қабылдап, әрдайым басшылық қызмет атқардым. Кейін Алматыға тағы жоғары лауазымға ұсыныс келді. Қаржы секторы ғой сол. Оған да келістім. Атап өтсем, бизнесті дамыту бөлімінің басшысы болып ауыстым. Франциялық Societe Generale деген банктің еншілес ұйымы болатын. Сонда еңбек еттім. Яғни, халықаралық компанияда да тәжірибем бар. 

Банк секторының ішінде түрлі сала болғандықтан, қайсына ауыссаң да, жаңа бағыт болып кете береді. Сондықтан мен өзімді қаржы нарығындағы кез келген ішкі саланы алып кете алатын, генералист маман деп айта аламын. 

Мәселен, банкте жалпы жеке және заңды тұлғалармен жұмыс істеу болып бөлінсе, мен соның ішінде жеке тұлғалармен жұмыс бағытында еңбек өтілім көп. 

Банктегі қызмет несімен қызық?

Банктегі қызмет... Мен үшін өте қызық. Негізі есеп болғанымен, жұмыс барысында түрлі soft skills-імді дамыттым. Яғни, коммуникация, сыни тұрғыдан ойлау, идея генерациясы және басқа дағдыларымды дамыттым. Себебі басшы болудың өзі тек жұмысты ұйымдастыру және үлестіру емес. Сонымен қатар, ұжымдағы атмосфераны, мотивацияны жақсартып отыру, қызметкерлердің дағдыларын арттыру. Өзіңмен бірге олардың да карьерасының өсуіне атсалысу. Командамен жұмыс істеп, бірге жетістікке жету. Негізгі қызметіміз бір жағынан – банкке табыс әкелу, ал екінші жағынан халыққа қызмет көрсету. Осы екі бағытта жетістікке жетуді көздедім. Ол үшін үшін әр қызметкерді тұлға және маман ретінде дамытуды да меңгердім. Себебі бұл дағдыларсыз екі бағытты алып жүру оңай емес. Әрине, үздіксіз процесс және өте қызық процесс.

Клиенттермен жұмыс, тренинг жүргізу – мұның бәрін меңгердім дейсіз ғой?

Иә, әрине. Қаржы институтында жұмыс істегендіктен жоспар болады. Жылдық жоспарымды құрамын. Содан кейін оны тоқсанға, айға, аптаға бөлемін. Одан қалды күнделікті жоспар болады. Сол себепті қызметкерлерге үздіксіз күнделікті тренингтер жүргіздім. Сөйтіп жоспарға сәйкес, мақсатқа жетеміз. Ол үшін өзім де үздіксіз оқимын, үйренемін. Клиент базасын ұлғайту үшін компаниялардың басшыларымен келіссөз жүргізіп, келісімшарттар жасадым. Бұл – теңдессіз тәжірибе. Өз өніміңді ұсынып, клиенттің назарын аудару, екі жаққа да тиімді ұсыныс айтып, келіссөз жүргізу де – өнер. Бәрі үздіксіз тәжірибемен келді және соны өз бөлімімдегі қызметкерлерге де үйреттім. Осылайша тренинг жүргізуді меңгердім.

Өзіңіз үшін қызметіңіздегі ең маңызды кейспен бөліссеңіз?

Осынша жылдық тәжірибемде түрлі кейс бар. Соның ішінде өзімнің жеке тәжірибемнен автонесиелеуді атап өткім келеді. Себебі менің қаламдағы филиалда автонесие бағдарламасы болған жоқ, яғни менің бөлімімде мұндай функция болмады. Автонесие тек ірі қалаларда ғана қолжетімді болды. Ал мен автосалондардың басшыларымен келіссөз жүргізіп, біздің филиалмен жұмыс істеуге келістім. Басында бұл қорқынышты болды. Автосалон жоқ. Бірақ мен автонесие ұсынуымыз керек деп шештім. Тәуекелге бел буып, келісімшарт жасап, жауапкершілікті өз мойныма алып, автонесиені енгіздік және нәтижесі мен жоспарлағаннан да жақсы болды.  Жеке өзім үшін де, банк үшін де үлкен жетістік еді. Осы кейсті ерекше атап өткім келеді.

Тағы қандай идеялар ұсындыңыз? 

Банк саласында еңбек еткенде үнемі ізденіс үстінде болып, жаңа идея, жаңа дүние жасауың керек. Бір сарындағы жұмыспен жетістікке жете алмайсың. Күн сайын жаңа жол іздейсің. Сондықтан мен түрлі мотивациялық проектілер, клиенттерге және банк қызметкерлеріне акциялар ұйымдастырдым. Барлығы нәтижелі болды. Сондай-ақ, қызмет еткен ұйымдарымның басшылары үнемі еңбегімді бағалап, мақтау қағаздарын табыстады. Сонымен қатар, Societe Generale жақсы жұмыс істеген қызметкерлеріне өз акцияларын беретін. Яғни, барлығына емес, тек белгілі бір көрсеткіштерге жеткен мамандарға берген. Соның арасында мен де бармын және оны мақтаныш етемін.

Сұхбатыңызға рақмет!